20071221 悟-挾上只需藉口

．ＯＫ．了解。假期前後粉飾櫥窗、「星期四宏調左唔使周末驚恐」，總之升，理性不理性並非討論範圍。好，睇你地玩，現金就是皇帝，這幾天成交太小，無人駕駛玩唔過。

．手上個ＰＵＴ，下次要練就練得投機一點，你同佢理性無用架，縮波縮溢價蝕時間值輸成你呀。但既然到了這個水平，要沽都無謂，見機而行啦。

20071220 悟-大戶消耗戰

．大摩公布業績，差到極，又學花旗同瑞銀賣肉求榮。想當初好難明點解呢Ｄ企業會踩落廁按呢個臭屎坑度。復元唔係無可能，但元氣大傷，療傷都需時。何況這只是季度業績，到幾個月後的全年業績，更不敢想像。維持看淡。

．又棋差一著。看淡方向對不對都好，手上ＰＵＴ被輪商玩縮波縮溢價玩殘，新聞組ＴＹ說得對，未來一兩星期交易日少，但時間值照扣，非常不值。不過沒計，既成事實，而距到期日還遠，一二月仍可爆

20071219 day trade PUT

．繼續玩技術性反彈。最怕你唔彈，一彈就是開ｐｕｔ時。玩個ｄａｙ　ｔｒａｄｅ，下午開波一陣即沽，見臨收市十分鐘發花癲抽上，今次快刀斬亂麻策略正確．雖知大方向是經濟陰霾主導，但見這兩天好友反擊，都要計算下，要更加小心，必要時甚至會策略性超短線買上

20071218 邊看淡邊做功課

．一開波都跌幾百，於是執行原定計劃，為減輕風險及預留現金，先放了恆指ＰＵＴ６０５０，留６０７７守城。沽６０５０亦是十二月首宗盈利，守得雲開。回顧這次持ＰＵＴ，是一驚險經歷，
　３１０００－＞２６０００＞２７０００－＞２９９００－＞２６３００
這堆ＰＵＴ是在中間２７０００時入的，因宏觀經濟恐怖過鬼又不可能有好消息而中短線全面看淡，卻犯了以為宏觀經濟必定＝股市的錯誤。２７０００－＞２９９００的驚風散教訓是，個市是大戶話市，廁按在前，但減息風吹，十一月底炒香港地產股亦炒足兩星期。但心理質素比前進步，知道要爆的終要爆，所以有耐心等到２９９００－＞２６３００

．之後大市雖反彈，但看淡之心不變，一來是升市成交不大，二來是力度非常有限。到晚上，歐洲央行公布注資銀行３４００億歐元，勉強解釋港股之些微反彈，是春江鴨活動。

．歐洲央行之注資，乃無計可施之緩兵之計。為了解困，甚麼自由經濟之原則和身段都要放下，但同時再次向世人自揭瘡疤，嚴重程度更是非出手不可。既然幾日前美聯儲連同各大央行之巨額注資都未成效，今番歐央舉動，又幫得多少？港股仍是無起色，尋底旅程未完。手上ＰＵＴ６０７７持有更放心。

．重大任務：研股、待壞消息出盡掃貨，仍在進行。

．看淡的態度暫時不變，但要打醒精神年尾的粉飾櫥窗或其他原因都可助大戶又搵藉口挾上，無厘頭升市仍有些微可能在短期出現。

20071217 預備放ＰＵＴ減風險

．大規模似樣跌市終於到來，不只因為手上有ＰＵＴ望佢跌多Ｄ，更希望是適度的調整，才會有靚價買貨，結果跌九百六十

．手上ＰＵＴ守到今時今日，由帳面怒蝕四十幾％到今日收市差幾格有錢賺，難以置信，亦證明對經濟看法沒錯，就不要被大戶的掩眼震倉法嚇倒

．不嘗試去估底，手上ＰＵＴ假如明日帳面變正數，就設止賺位、到某個短線偏高水平就減磅減風險兼預備錢買平貨

．挑選適合股份研究，特別是細價股，ＴＥＮＢＡＧＧＥＲ機會較大。另嚴切紀律位，非常確定一個方向才入輪，快刀進出，免損時間值

．今日陸羽仁提醒，今後買貨不要以今年九至十月水平作準，因為那個水平是超貴，即使從那個水平回落很多，都不能輕易話係平

20071214 跌開就跌

．大市跌開就跌。無咩特別。但個股弱得很，見到多個行業的個股都跌到唔清唔楚，跌的百份比相較大市更狼死。

．匯豐再拓新興市場，收購台灣的銀行，所以是日逆市造好。值得留意是，換著以前，匯豐有此等併購消息，一定借勢爆升，而家，氣勢差得遠。

20071213 美帝茅波惡果

．美帝蘇州屎想搵歐洲佬玩埋一份，救市又唔同埋減息一齊出，比人質疑補獲，跌是自然。早上跌得百零二百是序曲，正場下午上演，倒水咁倒。跌七百幾收場已經好比面

．很暢快。不單因為守了多時的PUT極有望短期內重見天日，亦因為幾星期來應跌不跌的怪象終過去，美帝打茅波咁耐風流咁耐折墮。

．弱市找強勢股。見內需股是市場所寵，明顯在炒CPI暴升概念。蒙牛(2319)並CALL輪一同爆升，雖然無我份，但喜見日後這策略是發圍的方法。是晚研究內需股

20071212 0.25後好消息出貨

．折騰好多日，大戶繼續操縱升市，星期二減息前一天都唔放過，夾硬又係要扯地產股上去迫恆指升七百幾。有諗過反正星期三都是好消息出貨，不如加碼PUT啦。但諗到呢D係賭，而且全無把握，就作罷。

．到星期三，美帝如所料只減0.25厘，貼現窗更只減0.25，少於市場預期。好消息終現。

．中鐵(390)唔理你狂升。但唔好恨，因為招股書被質疑盈利有古怪，想研究好才決定買不買

20071212 沽神＠香港討論區-歐洲.港股唔受FAKE

美國佬借抄息抄高全世界的事套現走佬!老美唔係想救,係將個問題轉移到其他國家上,而家係成功左第一步．見到港匯應該知,唔係吹水．鬼佬又黎半夜三更吹水話有救巿行動喇,想引老散及大戶入巿，好可惜港股唔受昆，歐股都唔受昆，佢老美就係人背後抽水走鬼。跌勢已成，今晚就算美股升，聽日後日都要跌．方向已經出左，一月美國會好大煲，要抽水就只有呢兩三個禮拜，期指友應該心水清，今日成個開淡倉格 ．一月你老美份業績一定可以用恐佈黎形容，呢一點就係琴日任老總講的"次按問題未完全反映"

次按爆完美國就到英國以至全個歐洲,而家全球央行咁好死一齊救巿?歐洲班友自己知自己事,還掂等死不如同美國佬一齊同流合污,聯手係向亞洲搶錢救自己.坐定定睇住香港、大陸、日本、韓國來緊呢兩個星期點比人洗刧

好人好姐,唔食葯都肥肥白白長年白歲．得左絕證,梗係要日日花幾憶買補品吊命.做咩呀?可以傳染比多d人陪葬等自己唔使死得咁慘囉

乾升抄減息就以為轉勢，美國經濟已經無得救，人地左頂右頂夾硬頂住個巿，為咩？大家心照啦
老美最勁係將問題轉移，搭好路後就全球抽水。
如果唔肯身有屎使攪咁多白痴野托巿，又口術又手術最後咩鎖息又係廢．又話有更suprise以為減0.5,咪又係減0.25.

睇位啦，今次大陸應該大大加息踩多腳．通漲通到生活都成問題

仲有 + X 呢條友性格我好熟佢，佢做野唔聲唔聲，但好實際，每次配股減持之後一個月左右，必定有大鑊野。要鬥戰積，四叔同佢差幾皮，人係勁就唔使聲大大．

hold put唔夠guts 就唔好玩啦，個大方向係要跌，夾得一兩日就驚頭驚尾走人，抵你輸。大戶一定洗到你頭暈.每次你地覺得絕望的時候,就會黎料

前期會參考超買、RSI、平均線等技術指標？ 而家個巿變左政治消息巿,呢d指標參考價值已不大.呢d巿無左常理就唔好再用常理睇佢喇.RSI都會用黎參考下止唔止賺囉

20071212 Lisa＠龍豐新聞組-美國迫人送錢

98年外國基金吸飽亞洲資金後遠走高飛,
留下我地捱了差不多十年,
依家歐美蒸發了好多錢, 而 d 錢去了邊 ?
我諗了好耐, 先諗通, d 錢去了中國貿易順差度,
因為 d 歐美基金把賺到的錢, 送了俾小業主套現消費 ~
呢十年, 我都好彩賺返了 98年時輸在股市的錢,
所以吾會再放太多錢在股市度 ~
美國依家千方百計想中國送返 d 錢俾佢地,例如迫人民幣升值,迫中國買多 d 美國貨,投資人民幣資產賺錢
所以大家自己要小心了,因為個金錢遊戲還會繼續 ~

20071212 任總：次按最壞情況仍未出現

金管局總裁任志剛說，美國減息1/4厘，但次按問題的影響，最壞的情況仍未出現，未來市場仍然會很波動。

任志剛說，聯儲局一如市場預期減息1/4厘，但金融機構過去一段時間大幅撇賬，增加注資，顯示次按問題引起的混亂，對美國及歐洲的經濟及房地產
影響嚴重，他認為最壞情況仍未見到，大家應持觀望態度。

他說，在次按問題未解決前，金融市場都會有很大波動並不出奇。香港同時受到內地宏調及美國情況影響，兩種方向不同的拉力，會令香港市場的波動很大，投資者應留意。

20071205 策略領悟

．比我非理性埋今次，應認輸唔認輸，玩陰乾危險過玩火，但既然在最應該止蝕時沒有止，而家咁既田地隨時轉勢，遲d蝕少d算啦

．策略檢討：玩正股超級強股如唔等錢使可以唔止蝕（但宏觀超不樂觀例外）；玩細股嚴守１０％止蝕；玩新股要定止賺位（因新上市ｃａｐ水行動通常ｍａｒｋ價過高，玩完群眾騷動心理可能會回落，若不回，又是優質股，則「放風箏」）；玩窩輪，頂盡十格一定要走，因為窩輪該是看某方向之順勢，若看錯，十格已夠證明

．止蝕，係因為既然佢有本事到上述定既止蝕位，即後市可以更差，基本上已經證明到自己的錯誤，承認錯誤，留得青山在，方為上策

20071204 亂鬼挾上悶爆

．都真係無咩好寫，數據差但繼續挾上，全世界跌香港獨升，係睇大戶在低成交下略施小招

．個市無份玩，所以就執資料，做分析等

．１２月市況反覆，預左未必可以好似早兩三個月咁易係個市搵錢，所以開展緊縮開支計劃，詳情仍在草擬

20071201 曹仁超-美樓市垃圾掃地氈底 ０８年憂慮仍多

有智慧不如趁勢，大趨勢係美國樓價08年仍回落，次按危機高潮08年上半年，對沖基金及主權基金07年入市，吸納美國大銀行及金融機構股權，結果木宰羊。大銀行將SIV納資產負債表，即日後SIV得失由銀行股東承擔。匯控好D，因為本身資本充足，花旗慘些因資金成本11厘（另阿布扎比有權將佢轉普通股）。九十年代美國佬笑日本銀行將垃圾掃入地氈底唔處理，今天美資金融機構何嘗唔係？垃圾掃入地氈底只係睇唔見，但唔代表唔存在。

人們仍期待另一個泡沫去抵銷美樓市泡沫爆破，聯儲局及各國央行都在努力挽救全球信貸市場，暫時止得咳，長期就唔知道有乜結果。熊市唔係一天內出現而係逐漸浮現，資金由弱項流向強項，最後連最強項目亦回落，人們才驚叫熊來了。第一個熊爪睇落今年8月出現，然後11月……正逐步擴散中。

20071201 曹仁超-風險機遇已反映，08年26000至32000點間浮沉

．恒指32000點已充分反映公司價值，此乃11月起港股回落理由（考慮08年所面對風險）；26000點已將明年面對風險充分反映，下跌空間有限。換言之，明年港股應26000至32000點間浮沉，受利好、利淡因素影響上落，消化03年4月至07年10月升幅。最難估係紅籌同H股，如港股直通車放行自然升，但現價偏高。可睇好九倉（004）、中銀香港（2388）、大新金融（440）及裕元工業（551）。九倉內地土地供七年發展用，日後來自內地地產收益令09年起純利急升；中銀香港係減息受惠者，佢係香港數一數二按揭貸款銀行；大新金融保險業務發展良好；裕元工業則有分拆概念。

．8、9、10月份港股急升，理由係流動性過剩。估計QDII基金將令330億美元資金流港，加上H股透過回歸A股，大大充實資產負債表。

．金融市場參與者往往泡沫後期最樂觀，例如油價（已由10美元升至接近100美元時），今年10月份銅價、鉛價及鎳價。令人擔心係內地樓價，甚至10月份本港國企股。啦啦隊隊長往往最唔合適時間引導投資者入市，因為人人樂觀。從走勢睇，標普五百已形成頭肩頂，依家正形成右肩，如長期上升軌1400點跌穿【圖一】，將會好大件事，因為可見1130點。

．瑞銀對明年股市展望係牛熊共舞，繼續stock picks，建議overweight亞洲（日本除外）。亞洲區純利增長仍係全球最強、最吸引，由於今年股市已出現雙位數增長，令明年揀股方面困難。小心「value traps」！明年最大風險係美國經濟衰退，樓市不景氣擴到各行業，類似香港1997年8月至2003年4月環境。瑞銀相信，明年美國經濟放緩而非衰退，投資者宜防守性（defensive）。歐羅開始回落，令歐洲漸漸恢復競爭力，亞洲區仍繁榮。

20071201 曹仁超-賺錢謙卑，蝕本冷靜

請記住賺錢時保持謙卑，蝕本時保持冷靜，勝敗乃兵家常事。
勝必須賈其餘勇追窮寇，賺盡一D；蝕必須速戰速決，虧損15％（最多20％）便離場

20071201 曹仁超-牛眼投資法

．牛眼投資法，發明者John Mauldin，04年出書推介。牛眼投資法每年追求「三位數字」（即100％）回報「Invest like a venture capitalist」，專攻二線股，做足工夫，搵行業正進起飛期或轉虧為盈。牛眼投資法較合散戶，但須做足功課！venture capitalist係當企業開始轉虧為盈時介入，非等人人叫好。Early bird catches the worms，又或者投資D引入創新意念企業

．最典型例子係蘋果iPod後再引入iPhone，令股價5美元升上180美元！本港成功例子如利豐（494）及思捷環球（330），利豐引入環球性採購概念，今天已成藍籌股；思捷拓歐洲品牌市場成就非凡。如起步期時介入，如今已成小富。五年前港人由睇唔起轉為愛上國企紅籌股。唔好人云亦云，訓練自己成「Top Gun」（股市第一槍手）或小李飛刀（例不虛發）。

．大藍籌留畀退休人士或已發達人士。唔易透過投資大藍籌股賺大利；二線股仍有機，巴西、俄羅斯、印度及中國內需股純利仍雙位數上升。金磚四國經濟正由出口導向型轉為內需推動型，內需增長估計維持到2010年

．追求100％回報一年並非唔可能。嘗試二線股尋十隻有機明年升100％項目，虧損15％便止蝕，將資金投入其他九隻……如此類推。如十隻二線股都須止蝕，10萬元投資仲剩8.5萬元（損失唔大）；如有五隻跑出，回報多！冇人保證一定成功，不過如嘗試勇氣都冇，便唔好羨慕人。如第一年唔成功便第二年，第二年唔成功便第三年……夜以繼日學揀股投資法，最終必擁有金手指。請記住「買乜？何時買？買幾多？」才係正確投資態度

20071201 黃國英-勿為小額心煩

最近連續有好幾位朋友問半新股的處理，尤其是群星紙業（3868）。心煩意亂，為的是一手兩手股票，絕對不值得。人生有許多困擾，要盡力令心境平靜，這些一萬幾千元的投資，不會發達，又不會輸死，何必苦苦思量，倒不如將心神時間用在其他地方或投資之上，回報會更加大。務請一定要止蝕，不是金錢上的考慮，而是釋放精神，精力的需要。

作者黃國英為證監會持牌人士

20071201 曹仁超-趨勢唔係走勢

真正有用係趨勢唔係走勢。例如：

一、遠見（Vision）。1967年美國人收入係港人五十倍，未來應睇好美國還是香港？1978年香港人收入係中國人五十倍，2007年港人收入仍係內地人五到十倍（視不同行業），點睇中港經濟？

二、才能（Talents）。以為係天賜，其實可自行發展。甲乙兩人，甲每天花一小時睇《信報》，乙每天花一小時睇其他報紙八卦新聞，十年後誰跑出？

三、創意（Creative）。甲事事關心，包括台灣富商與女明星關係、小甜甜爭產案、徐步高殺人。乙專注本業、學習本業技巧及理財之道，將過去失敗例子銘記於心，熟能生巧，投資發揮創意。十年二十年後誰跑出？

四、持久力。牛市短則三年、一般五年、長則七年；面對股票上升忙於止賺，不肯由頭賺到尾，忘記「止蝕唔止賺」格言。太早沽出錯過賺大錢機會

五、抉擇。面對虧損能否果斷堅決執行止蝕？面對環境改變，有冇糾正錯誤決定？以上五點決定你係邊一類人（一贏、二平、七輸錢）

20071201 曹仁超-贏大大，輸小小

成功投資策略係冒最低風險賺最大利潤！冇人可以每次選股皆正確，正確態度係發現選股錯誤便止蝕，唔做人世；如選股正確，「one life one love」（愛你一世）？投資目的唔係賺10％到20％利潤，而係double或triple資金。獅子稱霸係一擊致命，反而牛羊食草細細嚼慢慢嚥。點解牛往往被獅子吃掉？理由係：一、牛冇勇氣，一見到獅子只逃唔對抗。二、只食草，而唔利用自己鋒利角攻擊。90％投資者皆擁有牛羊性格，佢地馴良怕事，只管食草；只有10％投資者才有獅子?性格，只要加上適當訓練，便可以成為好揀股者（stock-picker）。

成功策略：

一、無論市好市淡都唔離市。形勢有利投資所佔比重大D；形勢不利投資所佔比重細D（Stay in the market）

二、入市前訂投資策略，天天望實，出錯即糾正

三、控制貪念及恐懼，平常心對待，「得莫喜失莫憂」。止蝕唔止賺，投資成功須守紀律。大趨勢中一定要勝出。唔好信密食當三番，贏大大，輸小小

四、你有冇做富翁勇氣？好多人想發達冇勇氣。有冇諗過每年將資本升值100％？有冇諗過賺一百萬、一千萬、一億甚至十億？中國人強調知足常樂，野心唔夠，唔會做野狼獅子老虎，失冒險精神五、投資策略令你致富，唔係股市貼士。致富唔係克勤克儉，係成功交易（deals）。學習做出色Deal Maker，避97年7月香港樓市回落風險，利用01年中國「十．五」計劃下引發工業原材料漲價潮。「十一．五」規劃令去年內地金融股、零售股暴升．去年越南股市及樓價狂升，美國財長保爾森去年7月10日辭高盛主席前，投資中國為高盛證券賺取驚人利潤，自己財富累積至七億美元

20071201 曹仁超-泡沫中賺錢

如何在泡沫中賺錢？旺市莫估頂，冇人可以最高價出貨！訂止蝕盤（如下跌10％至15％便止蝕）放心玩揀股（stock-picking）遊戲。黃金歲月唔少股價可升50％至100％，部分股份可回落50％。同樣形勢可以產生唔同後果，贏家永遠係少數，此乃投資市場鐵律。投資思維達到社會上10％人口水平，非停留在70％大部分人水平，做到出類拔萃，絕對唔係打電話問功課。成功背後係苦功，只要功夫深，鐵柱亦可磨成針（但千萬不要學人磨鐵柱，而係將鐵柱賣掉去買無數針）。要成功唔係刻苦耐勞而係做good deal！學做出色stockpicker

方法一：睇本報每日一股，學習揀股

方法二：睇我老曹寫日記學習捕捉趨勢（trend），全世界冇一個投資者係睇走勢發達的（賣走勢發達者就有）。內地A股有泡沫，但香港股市卻沒有，目前平均O只有十五點五倍，何來泡沫？內地A股90％已公布舊年業績，純利升幅43.5％，純利升幅可以支持A股ＰＥ四十倍，問題係今年A股純利能否續升45％？如今年純利升幅減半，便會令目前ＰＥ偏高。08年兩稅併軌，內地公司獲減稅，即08年內地公司純利多一項利好因素支持。內地A股只係短期偏高，中長線看純利上升空間仍十分好，純利大升者股價可獲支持，純利無法大升者則面對獲利回吐，又係個別股份問題。今時今日炒股票，必須學曉壞消息入貨、好消息出貨才掂。千萬不可在公布好消息後才入貨