20080125 劇情豐富的一周

．回顧：
今周市況劇情豐富，遺憾未能全程目睹經過，但精華不得不記：

周一：美股假期，港股自由行，廁按餘威未散再跌千幾
周二：全球瘋跌，港股跌二千幾災情空前，陸羽仁估是大戶沽爆全球股市迫美帝小丑總統同白藍黑做野救市，到而家禮拜尾，又話係法興醜聞後全沽之前害群之馬亂入的好倉。咩都好啦，而家禮拜尾回看，短期底位已見。
周三：港股升二千三，補哂裂口之餘仲升突，現解話就知是有春江鴨知美帝提早大力減息
周四：早上內地官一句評論，變成口痕友亂吹直通車，早上爆升，下午傳出法興超級醜聞，加上意料中直通車未開得的澄清，升八百幾變倒跌五百幾，一個字精采
周五，受惠美帝忽然加快腳步通過救市方案：派錢、及憧憬其他措施陸續來，港股爆上千六點，重要指標是升返穿兼收在十天平均線上，短線企穩。

一星期大龍鳳後，港股點數計原本差唔多無郁，唔同哂既，係氣氛短線向好，又可以開一陣趴地，做番陣好友
另，諗番上星期四就全沽ｐｕｔ過肥年，卻賺唔盡本周初兩日跌三千五個浪，而家睇番，個ｄ跌唔係可以預估，上周四放，係理性，假如放到本周初，係賭博、不智，所以處理正確，無須悔過

．展望：
理性面是宏觀經濟即使美帝只是暫時止住咳好快又病發、及阿爺ｃｐｉ指標唔靚隨時又要落重藥，有隱憂，但股市面是大市超賣、美帝經濟略為修補憧憬避免陷衰退，港股受惠下足夠有幾日玩下。技術指標升穿１０天線２４５４０，阻力變支持位，下一關可睇住另兩條平均線１５０天線（２５６８５）、２０天線（２５９２８）兩大阻力，勢如破竹既就繼續玩兼補多少少貨囉，破唔到阻力位回軟既，就獲利又離場囉，加埋下周期指結算牛熊又黎摔角，美帝減唔減息都大把藉口玩，又係個句：見機而行啦。

．報倉：
正股入手：
洛陽鉬業（３９９３）：金價又黎爆，其他金屬類都受惠，加埋全世界超賣，揀反彈爆炸力最強者買
中海油田（２８８３）：金價爆油價都陪，原本想買安東油田（３３３７），但全世界升佢死火撻唔著，於是重拾舊歡揀仍然超值、爆發力亦強的中海油田
ｃａｌｌ輪入手：
中移ｃａｌｌ（９９９０）：大市升，加埋中移超賣，入隻ｃａｌｌ輪搭順風車
而家係差隻息口敏感股，同埋隻硬係同我鬥氣既昆機（３００），呢一輪入貨行動就差唔多完成